eschequier

I.

Eschequier, ou Eschiquier, m. acut. Proprement prins est le tablier ayant soixante quatre places dans son quarré my-parties de deux couleurs et entremeslées, qui sont les loges des Eschecs rengez et marchans. Mais par translation Eschiquier entre Normans est celle Cour ancienne non sedentaire ne continuellement seant, à laquelle le Duc s'il vouloit, les Prelats, les Barons et Chevaliers, les Seneschauxs et Baillifs, les preud'hommes, les bons bourgeois et scavans advocats de Normandie s'assembloient, pour la decision des grands plaids des gens du pays, lequel Eschiquier estoit tenu deux fois l'année, à Pasques et à Noel, tantost en un bailliage et ville, tantost en autre. A ceste assemblée les baillifs estoient tenus se presenter au commencement et premiere seance d'icelle dedans l'heure de midy du second jour des presentations au plus tard, comme celuy de Rouen, Gisors, Caux, Bayeux, Caen, Costentin. Et là les advocats et autres dudit Eschiquier assistans par jugement estoyent assis selon leur rang; ne parlans les uns aux autres, et sans faire noise. Nul n'osoit s'entremettre d'y advocacer ou consulter sans serment preallablement fait de faire l'un et l'autre loyaument sans acception de personne: Autres plusieurs chefs de serment y estoient prestes par lesdits advocats, contenus és ordonnances dudit Eschiquier tenu à Rouen à Pasques l'an mil trois cens quatre vingts et six. Avoient les seants voix deliberative, voire les advocats mesmes: mais és causes tant seulement dont ils n'avoient esté consultans ne plaidans devant aucun juge inferieur, ou audit Eschiquier mesmes, ou desquelles ils n'auroient dit et declaré en appert ailleurs, leur advis et opinion, ores que ce n'eust esté en jugement, ou comme consultans en la cause. Ceste Cour et assemblée de jugeans estoit dite Eschiquier, pour estre composée de tous estats et diverses qualitez de personnes, comme l'est le jeu des Eschecs. Et estoit le dernier ressort de la justice en Normandie, dont les degrez inferieurs sont basse justice, Viconté, Bailliage. Despuis la reduction dudit pays de Normandie à la couronne de France, ledit Eschicquier estoit appelé la Cour, et selon ce, est escrit esdites ordonnances, que si les advocats plaidans et consultans sçavent aucune chose estre le droict du Roy, ou luy toucher en aucune maniere, ils seront tenus en advertir la Cour, c'est à dire l'Eschiquier. Or a esté supprimé l'Eschiquier en toutes les contrées dudit pays de Normandie (hormis au duché d'Alençon, où il est encores tenu par chacun an) et au lieu d'iceluy a succedé et esté establie la Cour de Parlement seant à Rouen. Anciennement les gens tenans l'Eschiquier de Normandie s'intituloient les maistres tenans l'Eschiquier au terme S. Michel, ou au terme de Pasques, et de telles leurs despesches ainsi commençants s'en trouve en date de l'an mil trois cens dixhuict, mais par apres ils se nommerent et intitulerent les gens tenans l'Eschiquier.

Tenir l'Eschiquier, Forum agere.

Tenir l'eschiquier et les grans jours, Conuentus agere.

II.

Eschequier, voyez Eschecs.

Thresor de la langue françoyse. Jean Nicot.